1 "दाहा"
*DAHA - A collection at Bodo Poem of Soneswari Basumatary.
Published by: Soneswary Basumatary. Gurmow (Goreswar)
Pin - 781366
First Edition: January, 1994
Cover Print: Kabindra Boro
Copyright Reserve by the Published
Price Rs. - 7
Printed at Bhabani Printers, Goreswar. Pin 781366.
"लिरगिरिनि फंनैसो "
'थुनलाइया हारिनि आयना' जायहा थुनलाइ गैया बे हारिया सोदोमस्रि गैया आरो बिहा साजाय- आजाय गावखौ स'मायना खालामनो, गुबुननिख्रुइ साबसिन हामसिन जाहोनो रोंआ होननाय बाथ्राया गोदानै आं बुंनाय बाथ्रा नंआव। ओंखायनो आं दिहुननो लाजेननाय "दाहा" खन्थाइ बिदांखौ बर' थुुुुुनलाइनि आयनायाव गस' होना दिन्थिनो सानदों।
नाथाय आंनि थौले मेलेमनिफ्राय बेरखांनाय बाथ्राफोरा नंगुबै खन्थाइनि महर मोनदोंना मोनाखै बेखौ बिजिरनो, मेलेम गोनां गेदेमा थुनलाइगिरि बिथांमोननिसिम खावलाइनाय थाबाय।
गोजौ फरायसालियाव फरायबाय थानाय समनिफ्रायनो खुगा मेथाइ, गोदान मेथाइफोर सुजुयै , लिरै लोगोसे खन्थाइ होनना लिरथुमना दोनबोनाय दामोलाव आखाय होफ्लांबानो गोसोआ गावखौनो गाव एरखांबाय थानायलाय गोसोखौ बुरखायनिसै सानना बिजाब महरै दिहुननो लाथारबाय। नुजाहां आंनि "दाहा" खन्थाइ बिदांआव सेबखांनो होनाय खन्थाइ फोरखौ थांनाय बर' माहारिनि सोमावसारनायाव गावजों गाव नायनो हालायै जानाय, गुबुन हारिजों नाख्रेबजानायखौ नुनानै लिरनाय। "दाहायाव" नुजागोननि अनगाबो माखासे गोलैसोनानैबो थाबावबाय। फरायग्रा मानिजाथाव रायजो राजानि मदद, थुलुंगा, सुबुरुन मोनोब्ला रां- रुफानि जेंनाखौ गादबनानै ब्लाबो दिहुनफिननो नाजागोन।
प्रेसाव हैनो लिरस्लायबाय थानाय समावनो आदा भुबनेश्वर बर' आ आंनि गोसो गुदुं नाजानायखौ नुनानै हाजासे थुलुंगानायजों लोगोसे बिथांआ मिदिंथियोदि लिरगिरि महरै बर' हारिनि गेजेराव आयजोनि बिसाना आसि बिजौवाव साननो हानाय ओंखायनो आंनि अनगायै गोबां लिरगिरि आयजो ओंखारनो हानायखौ बिथाङाबो हास्थायो। बबेखानि गासबारि गोजौ फरायसालिनि फोरोंगिरि आंनिनो गुमै सिबिनां मुस्रि कबिनद्र बर'आ बिजाब महरै दिहुननो थाखाय माब्लानिफ्रायनो आंखौ बुंगासिनो दंमोन। लोगोसे लिरनायखौ हुदा खालामनो थाखाय सम सम थिनगासिनो थायो बिथांमोननि फारसे आंनि गंग्लायनाय थाबाय।
जोबथारनायाव आं मोबथिया जासे जालांनाय गोरोनथिनि थाखाय निमाहाजों लोगोसे आसि दिन्थिना हरोब्ला गंग्लायै आजावना लागोन।
एसेनोसै
सनेस्वरि बसुमतारि
गामि- गुरुर(गरेस्वर)।
 |
"दाहा"
सोरबा राज खुंगुरनि हाबिलायाव,
सोरनिबा अननाय मोनियाव,
सोरबा आंखौ रायनायाव,
धोन दौलतनि लाल'सायाव
गैया आंहा दाहा गाद्रासेबो।
दाहा आंनि थांखि सुफुंनो हायिनि,
सोलोंथायनि माइल खुन्थिया
स'हैनो हायैनि,
दाहा आंनि, गामियारि गुबुंले खान्थि
समाजनिफ्राय बोस्रांनो हायिनि,
दाहा आंनि, हारि, थुनलाइनो जौगा फारियाव
होथायजों थुलुंगानो हायिनि,
दाहा आंनि जिउनि थिरांथा गोयिनि।
"गंगा देबी"
नों दागाब गंगा
बे माया गोनां, जेथो गोनां
संसारनिफ्राय थांनांनायनि अबथिरा
उदखारि गंगार हारिनि
दुखार बार बारनायाव गोमोरबाय
नोंनि जोंथि आलारि
जिउनि सानजौफुं बुब्लियावनो।।
इनाय अनागारिनि
गिथाव, मुगैथाव दख्लासे जोमैया
नोंखौ मन'दों; नोंनि सायखंल'
नाथाय; हायाखै फोजोबनो बिसोर
माया गोनां जिउखौ।
नाथाय गंगा; नों गाबनांगोन
नोंनि गोथार मोदोमखौ, गोथै जिउखौ
जिनाहारिनि बोलि खालामनायनि
बिमा हारिखौ पापनि दौलेंजों बोन्थेनायनि।
नों गाबनांगोन
सोरगोआव दडब्ला सोरगोआव,
मोर्तोआव दडब्ला मोर्तोआव,
पातालाव दडब्ला पातालाव
गाबहै खाराव-माराव
फोरमायहै गाब राजानो,
फोरमायहै बोरलिं बुरैनो,
फोरमायहै थामजि थामकौतिनि रायजोआव
खोनासंथों बिजिरथों फिसानि जारिमिन।
नों साव हो गंगा
बे मुलुगनि सुबुंफोरनो
गाबथों बयबो; जेरै नों गाबदों
जाथों हालाय-जेरै नों जादों;
जेब्ला मुलुगनि मानसिफ्रा बयबो गाबगोन
साफ्रोमबो सुबुंनि मेगनाव मोदै ग'गोन
अब्लासो फैगोन सानसे बुहुमाव
अनज्लायनाय सुबुंफोरनि गेजेराव
बे मेगननि मोदैयानो लोमसावजानाय
उदखारि इनाय अनागारिनि गोहो
बोहै लांगोन, सुस्रा लांगोन
हारिनि अल'खद।
नोंनि हांमानि अरखौ फोजों गंगा
बे जोलैनि हांगार उदखारिनि बिखायाव
जोंब्लाव हो ब्लाव-ब्लाव
उरखां गौथुमफोरनि सोरगिदिं
खामग्लिथों दोहो दोहो;
जोबस्रांथों इनाय
जाय नोंखौ मुगैदों, फोजोबदों
जाय नोंखौ नेउसिदों
जाय हारिखौ फोथैनो सानदों।।
"लिमारिक"
1
बिबार बायदि
गोथार..........मोनब्ला
साफ्रोमबो सुबुंनि
साननायफोरा।
2
बै सान अखाफोर बायदि
सैथोमोनब्ला, मानसिनि बुंनायफोरखौ
जायामोन दिनै मुलुगाव
होंगो---दोंगो।।
3
फाख'ना दिनै आंखौ फोरोंबाय
संसारनि नुनायमानिखौ
आंगो साननाया,
नेहात निंखावरिनिसो हास्थायनाय।
4
जिउ
जिउखौ लानानै मानसिया
दुग्गायो सोरबा
रंजायो सोरबा
सोरबा अराय जिउआवनो
मोदै हुगारनाङो गसाइ।
नोंनि सोरजिखौ
नोंनि मायाखौ
सुबुंडा सोमोनाङो।
5
थांना थानायनि थुलुंगा
रावबो-रावनोबो
हाया होनो हाया
गावबा गाव थायाब्ला
स'सारावनो सोलोंना।
"लाथिख' बराद"
जोनोमनिफ्रायनो मोनबाय आंलाइ
जेबो जेनिबो बायदिखौ,
थेउबो माथो गैया
जेबो आंहालाय
आंखाल जेनिबो
माथो मोनखो मानोथो गैया
आखायाव।।
दङ सानस'हायि हाथरखि
सान अखाफोर
थेउबो माथो गैया सोरां
आंनि जिउनि अख्राङाव
मोजोमसे।
आंनि बिबार बारियाव
बारदों बायदि बिबार
समायना-रमायना
गेवलां-गेवथां
गोमो-गोथांथेउबो मोनाखै बारसेबोआ
खाय मोजोमाव।
बागान बारियाव थायदों
फिथाइ रोदाव रोदान
थेउबोसो आंलाय गोदाव-सोराव।
निजोम दरसि लाथिख' नखराव
आंनि जिउ खौरां।।
Tags: label3
खन्थाइ