गुरुदेब कालिचरण ब्रह्म (Gurudev Kalicharan Brahma)
जेब्ला कालिचरण ब्रह्मआ उजिदोंमोन बे समाव बर' हारिया मुस्रि गोमालांबायमोन। गुबुन हारिफ्रा बर' फोरखौ गावसोरजों थाफाहोआ आरो जाफा-लोंफा होआमोन। बेनिखायनो बर'खौ बयनिख्रुइबो उन्दै आरो मुगैथाव हारि साननानै म्लेस एबा मेस होननानै बुंनायमोन। मेसआ मोनसे समाव बरनि दोनजानाय मुंसे।आनदाजाव बै समनि मेस एबा दानि बर' आ जिदाइनजौ मुगानिफ्राय जिगु जौथाइनि गेजेरनिफ्राय लेथेर-फेथेर जाबोदों, सोद्रोमा गोयियाव मालाय हारिजों मुगै जादों। सै-सै खालामजाबोदों, उनाव गाव हारिनि खर' दैखांनांगौआव गेजेन जाबोदों। हारिनि बे अल'खद खौ नुनानै कालिचरणा मैखोम दैदैनगिरि महरै आवगायबोदों।
 |
| गुदेभ कालिचरण ब्रह्म |
जोनोम:
पर्ब्बतझरनि सिंङाव थानाय काजिगामियाव गुरुदेबा 1860 मायथाइ नि 18 एप्रिल अक्ट खालि अखानायसि समाव जोनोम जोयो(born on 18 April 1860) बिफानि मुंङा खौला मेस आरो बिमानि मुंङा रांनडिनि। बिमा-बिफाया इसोर फोथायग्रा धोरोमियाखाय कालिसरनाबो धोरोमसुला, सुबुं सिबियारि फारसे इनसेमा गोसो जानो हाबोदों।
सोलोंथाइ:
कालिचरणनि समाव खाथि खाला फरायसालि गैयामोन। बेनिखायनो बिफाया न'आवनो लेखा फोरोंनो बिरनारायन सरकारखौ दानसेयाव 3 रांनि फोरोंग्रा लायो। बोसोरनैजों कालिचरणआ आखा-फाखा जायो। बांला रावखौ मोजाङैनो रोङो।
बिफा खौला मेसआ बोसोरनैसो उनाव टिबकायनि गुदि फरायसालियाव फरायनो दोनहरो। बेखौ उथ्रिनानै फुथिमारि एम भि फरायसालियाव फराय हैयो। मानसिनि साननाय आरो इसोरनि साननाय बेसे आलादा। कालिचरणा बा थाखोआव फरायबाय थानाय समावनो बिफा खौला मासा रुंसारि जालाङो। कालिचरणा फरायनायखौ नागारनानै न'आव थानाङो। बिफा खौला मेसा बगरिबारि जमिदारनि सासे गिदिर सनमानगोनां मानसिमोन।
संसाराव हाबनाय
बिफा थैनायनि उनाव कालिचरणा 18 बोसोर बैसोआव खनस्रि मेलखौ हाबा लायो। बोसोर बारग'लांनाय लोगो लोगो सानै फिसा हिनजाव मोनो, दन्दि आरो नलिनि। फिसा हौवा गोयिखाय जोलै गालांनांगौ होननानै बाय बाहागिफोरा थिननाय लाय महर गोसा उपासि होननाय सिख्लाखौ हाबाखालामबावयो। उनाव उपासिनि गोरबोनिफ्राय फिसा हौवा मोनो। देबेन्द्र सनद्र कुमार आरो कनकलाल। फिसा हिनजाव मोनो कनायस्रि आरो हरनि।
कालिचरणा बिफा थैखांनायनि उनाव बिफानि फालांगियाव गोख्रों आखाय होयो। बिफा बादि बिख्रि बादानिफ्राय सिलाइ, जलधर आरो सिस्ति दैसाजों सोनाब बेंगल, सानजा बेंगल आरो बिहारजों दंफांनि फालांगि खालामबोदों। जेरै मावनाय एरैनो बिथांनि न'खराबो रोहो रोहो जाबोदों।
धोरोम लानाय आरो फोसावनाय:
कालिचरणा सिलाय बिख्रि बादायाव चरण मन्दलनि खर'सायाव ब्रह्म धोरोम बिजाब 'सारनित्य क्रिया'खौ मोनसनो। बेखौ फरायनानै कालिचरणा मोथो-मोथो मोजां मोनो आरो बे धोरोमनि सायाव गोथौ फोथायथि लाबोयो। बे समावनो बर'फ्रा बाथौ धोरोमखौ गुलाइ-गुजायाव बाहायलांबायमोन। बाथौखौबो नागारनानै खायफा खायफा गुबुन धोरोमाव बारस्लायनो लाबायमोन।
साहित्य क्रिया बिजाबखौ हिन्दि रावनिफ्राय बांलायाव राव सोलायदोंमोन महनि महन चट्टटपाया। बिनि लिरगिरिया ब्रह्म धोरोम फोसावगिरि स्वामि सिव नारायण परमहंस। कालिचरणा बाथौखौ नागारनानै ब्रह्म धोरोमखौनो बर'नि थाखाय नाजावनायाव गाहाम सानबाय। जेरै साननाय एरै मावनाय, इं 1905 मायथायाव कालिचरणा जमादार मेस, करण मनदल आरो चरण मन्दसौर कलकातायाव लानानै थाङो आरो सिव नारायणखौ लोगो हमो। बे समावनो कालिचरणा ब्रह्म धोरोमखौ नाजावो।स्वामिजों ब्रह्म धोरोमनि हुदाखौ सोलोंनानै न'आव फैफिनो। लोगोआव सारनित्य क्रिया, अम्रित सागर, परम कल्यान गिता, पूर्नसाधन आरो खिद्र ग्रतावलि बायदि बायदि। बिजाबखौ फरायनानै धोरोमनि रोंगौथिखौ लानो हायो। कालिचरणा ब्रह्म धोरोमनि स्रां गियानखौ मोननानै बर'फोरनि गेजेराव मोदाय खुलुमनायनिफ्राय नागारनानै सासेल' इसोर ब्रह्म धोरोमनि गेजेरजों खुलुमनांगौ होननानै फोसावनाय।